Skip Navigation Links
الرئيسية
مسابقات
أخبار وتقاريرExpand أخبار وتقارير
آراء و أبحاثExpand آراء و أبحاث
صور وأفلامExpand صور وأفلام
القاموسExpand القاموس
بروفايل
مدونة نريد
مبوبة
مؤتمرات وندواتExpand مؤتمرات وندوات
Shadow Shadow
كيف نصيغ بيانات صحفية ناجحة

تدريب أحزاب سياسية

 

 

 

الإعلام والتواصل مع الناس، مهم جداً للعمل السياسي، لأنه بيوصل أفكارنا وآراءنا ومواقفنا، للجمهور، والهيئات المختلفة، وده بيأثر في الصورة اللي بيكونها الناخب عننا، سواء سلبا أو إيجاباً، وكمان الناخب، بيتابع بعد كده ممارساتنا، ومواقفنا العملية، ويشوف ... هل هي متسقة، وماشية مع الرسائل الإعلامية، اللي بنبعتها ولا لأ؟

وكمان الجمهور بيبص على الرسائل اللي بنبعتها عبر فترات زمنية مختلفة، ويشوف احنا ثابتين على مواقفنا ولا بنغيرها و كل يوم برأي – وكمان بيقارن رسائلنا برسائل المنافسين – الأحزاب الأخرى مثلاً ... ويشوف مين الأقرب لفكره وبيعبرعنه أكتر ...

 

يعني رسائلنا الإعلامية بتعبر عن شخصيتنا ومبادئنا وبرامجنا، وبترسم صورتنا في أذهان الناس والرأي العام. وعشان توصل رسالتنا، فيه طرق متعددة، ومن أهمها "البيان الصحفي"، لأن البيان الصحفي، احنا لينا تحكم كامل فيه، ونقدر نطلعه بسرعة، ونبعته للإعلام عقب أي حدث مهم، عشان الناس  دايما تشعر، إننا معاهم، وبنحس بمشاكلهم، ومشاكل البلد، ومواكبين للحظة.

 

عشان كده حنتكلم في شوية نقط مهمة ... تساعدنا في صياغة ونشر بيانات صحفية فعالة ...

1- الهدف من البيان

- أول حاجه، لازم نحدد الهدف من البيان الصحفي .. يعني ايه هي الرسالة اللي عايزين نوصلها من خلال البيان .. و الهدف ده ممكن يكون الدعوة لشيء معين .. او اعلان موقف الحزب او الشخص صاحب البيان من حدث او قضية معينة ... أو توضيح شيء معين للرأي العام ... أو الرد على اتهامات أو هجوم أو إشاعات ... ممكن كمان نطلع بيان عشان نأيد أو نعترض علي سياسة او قرار للحكومة أو لجهة ما ... أو اظهار التعاطف مع فئة معينة ....

 

2- طبيعة المتلقين

- بعد ما نحدد الهدف من البيان، لازم نحدد طبيعة الأشخاص اللي عايزين نخاطبهم من خلال البيان .. سواء كانوا احزاب وحركات أخرى بنطالبها مثلاً بالتضامن مع قضية معينة، او مؤسسات حكومية زي الشرطة عايزينها تحقق في تجاوزات بعينها، أو عمال مصانع عايزين نأيدهم ونتضامن مع قضية عادلة تهمهم، لازم نسأل نفسنا ... اللي عايزين نوصلهم أغلبهم شباب ولا كبار .. موظفين ولا عاطلين ... وكتير بيكون البيان موجه للرأي العام كله مش لأي جهة بعينها، لكن تحديد طبيعة الاشخاص هو اللي بيخلينا نقدر نصيغ البيان بالشكل و المحتوي و اللغة اللي تناسبهم .. اللي يفهموها و يحسوا بيها ..

 

3- تجهيز البيان

- و من هنا، نقدر نبدأ في تجهيز البيان الصحفي .. اللي لازم نراعي فيه شوية حاجات:

*  اولاّ، لازم البيان يكون له عنوان بيعبر عن اهم النقط اللي هيتكلم عنها البيان

* ثانياّ، لازم ننظم البيان بحيث ان القرارات او التصريحات المهمة تكون في البداية ... عشان نقدر نجذب المتلقي و نوضحله مدي اهمية البيان

* ثالثاّ، لازم البيان يكون مكتوب بلغة واضحة وسهلة ومفهومة، ويوصل المعنى المطلوب بأقل عدد من الكلمات والعبارات، يعني الكلمة أو العبارة اللي ما بتضيفش جديد ما لهاش لزمة، بعيد عن التكرار والمترادفات والإطناب الممل، كمان بلاش الشعارات غير الواقعية و الكلام المرسل .. و يستحسن اننا نستخدم الجمل الفعلية اكتر من الاسمية .. لأنها بتزيد من قوة المعني وتأثيره علي المتلقي ...

* رابعاّ، لازم البيان يكون موضح شوية معلومات مهمة عن الجهة اللي أصدرته.. زي اسم الحزب او المرشح .. و زي التاريخ المقرر لنشر البيان اعلامياّ ... وطريقة التواصل معاها ... مثلاً المتحدث الرسمي أو الناطق باسم الحملة أو الحزب ...

* اخر مراحل تجهيز البيان هي المراجعة .. و عشان نعمل مراجعة شاملة، يستحسن اننا نعمل جدول فيه المكونات و الاهداف الاساسية من البيان .. و نشوف هل البيان غطي كل المكونات و الاهداف دي ولا لأ .. و طبعاّ، لازم  نتأكد ان البيان خالي من الاخطاء اللغوية أو المنطقية ... أو المتناقضات أو الجمل الطويلة ... و مفيد جدا إننا نقرا البيان بصوت مسموع ... عشان نشوف مدى سلاسته في القراءة والفهم ...

 

4- نشر البيان

- بعد تجهيز البيان، نيجي لمرحلة نشره .. و هنا لازم يكون عندنا قاعدة بيانات كبيرة ودايما بنضيف لها ونحدثها ... بتضم صحفيين و إعلاميين ومعدي البرامج التليفزيونية ... علاوة على الأحزاب والحركات السياسية  ومنظمات المجتمع المدني  .. عشان نقدر نبلغهم بالبيان .. كمان يستحسن اننا نوفر البيان في نسخة الكترونية للصحفيين .. عشان نسهل و نسرع من عملية نشره .. أما لو كان البيان بيساند جهة معينة، فيستحسن اننا نرسل البيان للجهة دي .. عشان تشعر بتضامننا معاها ...

 

5- متابعة البيان

- اخر مرحلة، هي مرحلة متابعة البيان في وسائل الإعلام .... و الهدف منها هو معرفة رد فعل المتلقين علي البيان .. و دي بتكون عن طريق متابعة طريقة تناول الاعلام ليه ... هل اتنشر؟ اتنشر في كام جريدة وموقع؟ على مساحة أد إيه ؟ في مكان ظاهر ولا مدفون في صفحة داخلية ؟ كان رد فعل الناس والكومنتات اللي على مواقع الإنترنت شكلها إيه؟ هل الناس وصلها المعنى المقصود ولا أساءوا تفسير كلامنا ومواقفنا ... .. ومع تكرار المتابعة بصورة منهجية ... أقدر أعرف اسم حزبي بيتنشر في الجرايد ويتذكر في الإعلام أد إيه ... كمان باعرف  هل الجريدة الفلانية بتنشر كل بياناتي الصحفية ولا نوع معين منها بس؟ .. و هل بتنشرها في مكان واضح في الجريدة و بتديها مساحة كافية ولا لأ .. و ده بيدينا خبرة كبيرة و بيخلينا نتعلم من اي اخطاء وقعنا فيها .. و كمان المتابعة بتخلينا نقدر نعرف مين مؤيدينا و مين معارضينا .. مين اللي مهتم ببياناتنا .. و مهتم بأي نوع من البيانات ... فنقدر نركز على الوسائل المؤثرة والمتعاطفة معانا، ونحاول نكسب الوسائل غير المهتمة بينا أو اللي ضدنا ...

 

ملاحظة أخيرة ...

و في الأخر، يستحسن اننا نعمل البيانات الصحفية لما يكون عندنا اخبار او قرارات مهمة فقط .. عشان نحافظ علي مصداقيتنا .. سواء في الشارع او في وسائل الاعلام  ..

 

نريد تدريب سياسى
كيف تحول المشاهد إلى شريك في المشروع السياسي للحزب
كيف نصيغ بيانات صحفية ناجحة
التحالفات السياسية
تنمية الموارد المالية
الإعلام والتواصل السياسي
المعهد الديمقراطى المصرى
المقدمة والفصل الأول - الاستراتيجية
الفصل الثاني - البحث
الفصل الثالث - الإتصالات والإعلام
دليل تدريبي للأحزاب السياسية
كتيب عن دور المال في السياسة: دليل الي زيادة الشفافية في الأنظمة الديموقراطية الناشئة
الحكومة الشفافة : تيسير وصول العموم الي معلومات الحكومة

عن نريد   -   اتصل بنا   -   الآراء والمقالات والمواد المنشورة لا تعبر عن رأي الموقع ولكنها تخص المشاركين Website By : Horizon Interactive Studios